نفى النجم أحمد حلمي هجومه على الفنان محمد رمضان وتفسير البعض رسالته التي كتبها منذ أيام على أنها موجهة لرمضان بعد شرائه سيارتين باهظتين الثمن من طراز “لامبورجيني” و”رولز رويس”.
وكتب حلمي عبر صفحته الرسمية بموقع “فيسبوك”: “أعزائي الكرام.. توضيح بسيط وسريع بخصوص ما حدث بعد نشر الصورة بتاعتي وأنا راكب العربية الميني القديمة اللي كانت معايا في فيلم ظرف طارق.. واللي الناس فهمت أنها بغرض أني بوجه رسالة لزميلي الفنان محمد رمضان، وهذا ما أحزني كثيرًا”.
وأضاف حلمي: “يا جماعة أنا لو عايز أوجه رسالة لأي حد أعرفه كويس أو حتي ماعرفوش مش هاعمل كدة على مواقع التواصل الاجتماعي.. ﻷني عمري ما عملت كدة أبدًا، لإني ببساطة ممكن أبعتله رسالة على موبيله أو هاكلمه في التليفون”.
وتابع قائلًا: “أما الكلام اللي كان مكتوب تحت الصورة اللي كتير من الناس ماعرفش إزااي بجد فسروه بالطريقة دي مع أنه فعلا مايخصش حد خالص غير واحد صاحبي هو الوحيد اللي هايفهمه لأني قايله بسبب موقف طريف حصل معانا وله علاقة بالعربية الميني.. علشان كدة نهيت الكلام المكتوب بـده كلام في سرك ….. ششش”.
واختتم حلمي رسالته: “زميلي العزيز محمد رمضان… ربنا معاك ويوفقك دايمًا وتحقق كل اللي نفسك فيه في حياتك الفنية”.
وبدوره رد رمضان على حلمي عبر حسابه الشخصي بموقع “فيسبوك”، قائلًا: “صباح الخير شكرًا للتوضيح وتمنياتي لك بالنجاح الفني والعائلي زميلي العزيز أحمد حلمي”.
جاء ذلك بعدما نشر رمضان الجمعة الماضية صورة له مع سيارتين فارهتين وكتب: “الحمد لله.. اشتريت أمس السيارتين الأقرب إلى قلبي لامبورجيني أفنتادور ورولز رويس جوست، بحب أشارك جمهوري كل اللحظات الحلوة في حياتي، جمعة مباركة صباحكم، بلون قلوبكم”.
وبعدها نشر حلمي صورة له من داخل سيارته القديمة وكتب: “تقدر تبوح بسر ينفع الناس؟ للأسف لأ .. ما هو عيب الأسرار كدة.. أكتر حاجة ممكن تفيد الناس بس للأسف ماينفعش تتقال.. ده كلام في سرك ..ششششش”، وهو ما فسره البعض على أنه رسالة موجهة لمحمد رمضان ولكن بطريقة غير مباشرة.
