Wednesday, November 21, 2018
اخر المستجدات

10 مهارات للعناية بالبيبي كل ام جديدة لازم تعرفهم كويس


10 مهارات للعناية بالبيبي كل ام جديدة لازم تعرفهم كويس

| طباعة | خ+ | خ-

قد ما الام بتكون فرحانة بالبيبي الجديد, هتكون مسئوليتها كبيرة بالعناية بيه, وخصوصا لو ام جديدة او اول بيبي ليها بيكون الموضوع لسه صعب لانه مش بيكون عندها خبرة كفاية, وبتقابلها مشاكل كتير زي مشكلة قلة النوم, وتهدئة البيبي, والتغذية, ولازم تكون كل ام مستعدة لكل التغييرات الجذرية في اسلوب حياتها, عشان كده النهاردة بنات حوا هتساعد كل الامهات الجداد في المهمة دي وهنقولك قايمة فيها مجموعة من مهارات العناية بالبيبي هتفيدك في تسهيل المسئولية عليكي.

مهارات العناية بالبيبي:

1- ازاي تشيلي البيبي:

اول ما الام بتستلم البيبي, معظم الامهات مش بيعرفوا يشيلوه ازاي بطريقة صح, خصوصا ان لازم انك تتعاملي معاه بحرص جدا وهو لسه مولود.

رقبة الطفل هي اكتر جزء حساس في جسمه, ولما تشيليه لازم تحطي ايدك تحت راسه, لان في الفترة دي الطفل ميقدرش يتحكم في راسه بنفسه, فمهمتك انك تشيلي البيبي بشكل صح, هتكون ايد تحت الراس وايد تحت منطقة الوركين.

كمان لازم تكوني حذرة جدا من المناطق اللي لسه بتكون طريه في راسه, واتجنبي لمسها بقدر الامكان, عشان توفري له اقصى درجات الحماية على قد ما تقدري وتخليه يحس بالامان معاكي, وطول ما انتي شيلاه خلي دايما قريب من صدرك.

2- ازاي الام تهتم بنفسها اول 30 يوم:

اول تلاتين يوم بعد الولادة بيكونوا مهمين جدا, وفي الوقت ده لازم تهتمي بنفسك كويس جدا عشان تقدري تهتمي بالبيبي بأفضل طريقة ممكنة.

الامهات في الفترة دي لازم ياكلوا كويس جدا وبشكل صحي, وخصوصا لو بترضعي رضاعة طبيعية هتكوني محتاجة تغذية كويسة, ومن اكتر المشاكل اللي بيعاني منها كل الامهات الجداد هي مشكلة النوم, عشان كده بننصحك انك تنامي وقت نوم الطفل ده هيضمن لك انك تاخدي كفايتك من النوم.

3- ازاي تلفي البيبي:

لف البيبي بشكل صح هو السر او المفتاح اللي هتخليه هادي ومرتاح, وعشان تلفيه صح اول خطوة افردي الحاجة اللي هتلفيه بيها على شكل ماسة, اتني الزاوية اللي فوق وبعدين حطي البيبي, اسحبي جنب واحد فوق صدر الطفل, وخلي الزاوية تحت دراعة, دلوقتي اتني الزاوية اللي تحت على رجلة, وخلي التنية ورا الكتفين.

اسحبي الجنب التاني فوق الصدر واتنيه تحته, بمجرد ما تلفيه بشكل صح شيليه قريب من صدرك, كده هينام بشكل اسرع لانه ملفوف بشكل مريح.

4- ازاي ترضعي البيبي بشكل صح:

الرضاعة الطبيعية مهمة جدا, خصوصا في الايام الاولى, لان في الفترة دي لبن الام هو المصدر الوحيد لتغذية البيبي, عشان كده مهم انك تعرفي ازاي ترضعيه بشكل صح, ممكن يكون الموضوع بسيط في بعض الاحيان, لكن الامهات الجداد بيتعرضوا لمشاكل, مش بيعرفوا يشيلوا البيبي بشكل صح اثناء الرضاعة, او اللبن مش كافي, او بتحصل التهابات ثديية.

في اكتر من طريقة تقدري تستخدميها للرضاعة الطبيعية, زي ما هو باين في الصورة اللي قدامنا كل الاوضاع اللي ممكن تستخدميها, تقدري تختاري منهم اكتر وضع مريح ليكي وللطفل.

وهنقولك نصيحة مهمة لو البيبي دايما بينام اثناء الرضاعة, عشان تصحيه زغزغيه في رجله من تحت عشان تخليه يفضل صاحي, ده هيضمن لك انه هيرضع كويس ومش هينام وهو معدته فاضية.

5- ازاي تعملي تجشؤ للطفل:

التجشؤ بعد الرضاعة مهم جدا خصوصا في الشهور الاولى, لان معدته لما هتبقى مرتاحة هيرضع كويس وينام كويس, وعشان تعملي الموضوع ده بشكل صح امسكي الطفل على صدرك بحيث دقنه تكون على كتفك, ومتنسيش تكوني ساندة راسه وكتفه بايدك, دلوقتي افركي ضهره بالراحة او طبطبي عليه لحد ما يحصل التجشؤ.

طريقة تانية للتجشؤ, نيمي البيبي على رجلك على بطنه وخلي وشه لتحت, وامسكي الفك والدقن بايدك, واتأكدي انك ترفعي راسه فوق شوية, عشان تدفق الدم ميبقاش ناحية الراس, دلوقتي افركي او طبطبي على ضهره بالراحة.

في حالة لو حسيتي ان الطفل حاسس باختناق, دلكي منطقة الصدر 5 مرات باستخدام صوباعين, وبعدين نيميه على بطنه على رجلك بنفس وضعية التجشؤ لحد ما يبدأ الطفل يكح, الكحة مؤشر انه بقى كويس وانه اتخلص من اللي كان مضايقة, بس افتكري دايما ان الطفل صغير ولازم تتعاملي معاه بالراحة وبحرص جدا من غير استخدام قوة.

6- ازاي تعملي مساج للبيبي:

المساج عادة بيتعمل للاطفال حديثي الولادة عشان يخلي عضمهم وعضلاتهم اقوى, القاعدة الاولى للمساج انه ميكونش قبل ولا بعد الرضاعة, عشان تعملي مساج ناجح للطفل امشي على الخطوات دي.

حطي الطفل على فوطة او كوفرتة على سطح مريح زي السرير, وابدأي اعملي له مساج بزيت نباتي, ابدأي بالساقين, وبعدين الذراعين, وبعدها الصدر, واخر حاجة الضهر.

المساج مش بس لراحة الطفل هو كمان بيساعد على تقوية العضم والعضلات, وكمان بيعمل رابط بينك وبين الطفل اثناء فترة المساج اليومي.

7- ازاي تحمي البيبي:

الام دايما بيكون عندها خوف شوية من موضوع حمام البيبي, مهم جدا انك تعرفي ان البيبي خلال الاسبوع الاول مش محتاج اكتر من انك تمسحي جسمة باستخدام سفنجة ناعمة, وينصح انك تستني لحد ما الحبل السري ينشف وينزل من نفسه عشان تبدأي انك تحميه في البانيو بتاعه.

وفي الفترة دي البيبي مش محتاج لحمام بشكل يومي, كمان لازم تشوفي درجة حرارة المية قبل ما تحطي الطفل فيها, ومتسيبهوش ولا لحظة من غير ما تكوني واخدة بالك منه كويس جدا.

8- ازاي تخلي البيبي ينام:

الايام الاولانية للبيبي بتكون صعبة بشكل عام وبشكل خاص في اوقات نومه اللي بتكون مش منتظمة, والام بتتعب جدا في الفترة دي عشان تخلي البيبي ينام, لانه بيكون جوه بطن الام في بيئة دافية وضلمة وبيخرج للنور ده بيخلي نومه مش منتظم في البداية, والخطوة الاولى عشان تعرفي الطفل انه موجود في عالم جديد وازاي الناس بيناموا هو الضوء, حاولي تخلي الضوء الطبيعي يدخل الاوضة اثناء فترة النهار, وبالليل تولعي ضوء خافت, ده هيساعد البيبي انه يفهم الفرق ما بين الليل والنهار.

اثناء نوم الطفل بيبقى شكله وجميل وكتيرمن الامهات ممكن تحاول تبوس البيبي او تكلمه وهو نايم, لكن ده تصرف مش صح لان ده ممكن يدي اشارة للطفل انك مستعدة للعب معاه وده هيخليه يصحى, ونصيحة من الخبراء والمتخصصين انك تكوني صبورة لحد ما الطفل يدرب على النوم بشكل صح.

9- ازاي تغيري الحفاضات:

تغيير الحفاضات مش مهمة صعبة لكن بالنسبة للام اللي لسه جديدة بيكونوا خايفين وقلقانين من المهمة دي, اول حاجة لازم تحطي في اعتبارك انك تلبسيه الحفاضات بشكل صح لحد ما الحبل السري ينشف ويقع.

متلبسيش البيبي الحفاضات فوق مشبك الحبل السري لكن خليه دايما تحته, لان المفروض ميكونش في ضغط اضافي على المنطقة دي.

في كمان حاجات تانية لزام تحطيها في الاعتبار, لما تيجي تسحبي الحفاضة اللي مش نضيفة اسحبيها من قدام لورا خصوصا بالنسبة للبنات, لتجنب اصابة البيبي بأي عدوى.

اتأكدي برش بيبي بودر قبل ما تلبسيه الحفاض الجديد, ولو البيبي مصاب باي طفح جلدي لازم تاخدي احتياطات اضافية زي انك كل شوية تشوفيه نضيف ولا لا, لان الحفاض اللي مش نضيف ممكن يزود من حدة الطفح الجلدي, ولازم يبقى عندك دايما مرهم مضاد للطفيليات للحالة دي حتى لو طفح جلدي بسيط, كمان اتجنبي استخدام اي صابون معطر او حفاضات معطرة لحد ما يختفي الطفح الجلدي بشكل كامل.

10- ازاي تعملي ارتباط مع البيبي:

عشان تقوي الترابط بينك وبين البيبي كل اللي هتكوني محتاجاه ان بشرتك تلمس بشرته عشان يحس بيكي, والعادة دي المفروض تبدأ بمجرد ولادة الطفل, حاجة كمان مهمة هي انك تبصي في عيون البيبي وتكلميه, ممكن يكون غريب شوية انك تكلمي طفل صغير مش فاهم حتى اللي بتقوليه, لكن هو بالفعل بيكون فاهمك.

ولان رؤية البيبي او نظرة بيكون ضعيف في اول فترة يعني بيشوف لمسافة 30 سم بس تقريبا, قربيه منه اوي, وابتسمي, وكلميه.

غني له, اعملي له مساج, خلي في وقت مخصوص بينك وبين طفلك, كل ده هيقوي الترابط بينكم, والترابط اللي بيتعمل في السن الصغير ده بيخليكي تقطعي شوط كبير معاه.