الوطن اليوم / مشاهير
ردت الفنانة نشوى مصطفى على من هاجموها عبر حسابها الشخصي على “فيسبوك”، بسبب مشاركتها لصورة بائع بطاطا.
كانت مصطفى قد شاركت صورة باعة متجولين، وعلقت عليها على الصورة “عفارم عليهم أنهم ما استسلموش للإحباط وللبطالة ولا قعدوا يشتموا في البلد”.
و هاجمها الكثيرين متهمين النجوم والمشاهير بالترف، وبأنهم لا يشعرون بمعاناة الشعب، فردت مصطفى برسالة شديدة اللهجة على مهاجميها قالت فيها “نتيجة للردود اللي بعضها سخيف وبيقولوا لي انتي فنانة بتاخدي فلوس قد كده ومش حاسة بالشباب المحبط وعايزانا بعد ما نتخرج من كلياتنا المحترمة نبيع بطاطا”.
“ونتيجة الرسايل الشتيمة الانبوكس، عايزة أقول لهم أولًا – أبويا الله يرحمه كان من الطبقة الكادحة الطبقة تحت المتوسطة بشوية كتير، أبويا رباني إني أكون راجل، بمعنى إني لما اتخرجت ومالقتش شغل عملت وجبات جاهزة في البيت وبعتها فى العتبة للبياعين اللي بيشتغلوا فى محلات الملابس، ليه العتبة بالذات، لأني في أجازات الصيف بتاعت الجامعة كنت بشتغل بياعة في المحلات دي علشان يكون معايا فلوس زيادة عن المصروف اللي باخده من أهلي”.
و تابعت “ليه عملت وجبات جاهزة وبعتها؟ لأني كنت عايزة أدرس تمثيل، دخلت المعهد وابتديت تمثيل بعشر مشاهد في ضمير أبلة حكمت وكان أجرى في المسلسل كله ٢٥٠ جنيه، كنت ساكنة في شبرا بيتنا أوضتين، دلوقتى بفضل ربنا وبمجهودي أنا ساكنة في فيلا دورين بحمام سباحة في أرقى مكان في التجمع الخامس، اتعلمت في مدارس حكومة وكنت باخد الكتب ببلاش في الجامعة لأني كنت مقدمة مفردات مرتب والدي أنها بسيطة”.
“دلوقتتى بفضل ربنا وبمجهودي ولادي جامعة أمريكية وألمانية، ماحدش ساعدني غير ربنا مافيش منتج دعمني واداني بطولة وأنا أستاهلها بجدارة، أثبت إني بمشهدين تلاته ممكن أسيب تأثير وأحقق نجومية باشوفها في كلام معجبيني في كل مكان جوه مصر وبراها، أنا بشتغل بمجهودي، اتحاربت وصمدت، اتساومت وما استسلمتش، لأني مؤمنة بحلمي ومؤمنة بأن ربنا مع اللي بيتعب، حارب علشان حلمك وماتشتمش بلدك ولا ظروفك ولا تشتم الممثلين”.
اعتذر الكثيرين من نشوى بعد ما قالته، وأكدوا أنها نجمة لها تاريخ وأن جمهورها يحبها، وأن الناس عادة لا تعرف كفاح المشاهير للوصول لما حققوه.
