معاذ العامودي
١٣٤٦٤ مولود جديد في غزة فقط خلال الربع الأول يعني من ١-١-٢٠١٤ حتى ٣١-٣-٢٠١٤، خليني أعيد الرقم بالحروف يمكن مش سامعه كويس “ثلاثة عشر ألفاً وأربعمائة وأربعة وستين مولوداً” منهم ٦٨٤٠ ذكر يعني أكثر من خمسين بالمية ذكور وبواقع ١٤٧ مولداً جديداً يومياً.
“خمسة في عين اللي ما يصلي عالنبي” هذا العدد في ظل الانقسام والحالة النفسية السيئة وانقطاع الرواتب والكهرباء كيف لو الناس رايقة وبالها هادي يا أبو هادي؟!.. في منطقة طول بعرض بتجيش شبرين ونص، وكل يوم “بتْطُّزْ” ١٤٧ نفر… اللهم زد وبارك، وعين الحسود فيها دود، وغزة عدْهَها طفحت فوق ما هي طافحة.
بالنسبة للتغير الديمغرافي بينا وبين اليهود تقلقش النتيجة خمسين صفر، كل يوم لدينا ١٤٧ فلسطيني جديد في غزة لحالها بس غير الضفة والداخل والشتات.. شوف عزيزي أي حكومة قادمة مستقبلا ستفشل بامتياز عارف ليش؟! لأنه سيكون أمامها كحد أدنى توفير ثلاثة وخمسون ألفا وثمانمئة وستة وخمسين وظيفة سنوياً عافتراض إنها ستوفر لنصف المواليد خلال عام.
وتحتاج نفس العدد من الشقق ونفس العدد من عدَّادات الكهرباء وخطوط المياه ومدارس وأسواق وسيارات وطيارات وجامعات ” الجامعات كثيرة أكثر من أمريكا لدينا جامعات نسبة وتناسب” ولن تكفي لنا الأنروا وأخواتها ولا الكبونة ومشتقاتها.
غزة يا ملِيكي بالعَارِض بيكفي “لأنه كمان ٥ سنين عالحالة لن يكفي التوسع الأفقي ولا العمودي ولن يكفي أي حل سوى اللولب أو حبوب منع الحمل”.
يلا يا عزيزي خود الجانب الإيجابي هذا أصلا لصالح القضية الفلسطينية والتغير الديمغرافي مهم لأنه سيسبب الانفجارالكبير وعودة اللاجئين وعشان ننتصر عاليهود -هيك بيقول جارنا الختيار- عنده ١٧ نفر كل واحدمنهم عنده١٧ آخرين… مش مهم النوع والكيف المهم الكم عزيزي وكله بيعرف يطخ..
وأنا مالي يا أبو يزن دع الخلق للخالق
